|
July 2010
Keatsers stride op de PC om jild en eare
De Keninklijke Permante Commissie hat it prizenpakket foar 2010 oanpast. De kommisje hat him ferdjippe yn de PC-prizen troch de jierren hinne en komt ta de konklúzje dat it rjochtfeardige is werom te gean nei de oarspronkelik útloofde prizen, te witten jild en (tekens fan) eare.
By de earste PC yn 1854 gie it om jildprizen: 36 gûne foar de earste priis, 9 gûne foar de twadde priis. Dizze bedragen wiene foar it partoer. Fertsjinne in arbeider destiids trochinoar in tientsje wyks, dan wûn in earste priiswinner op de PC dus in rojaal wyklean! Boppedat krigen de winners, as teken fan eare, fan de earste PC of, in krânse. Dat wie in paadsljochtsjende feroaring foar dy tiid.
De priiswinners krigen yn 1854 dus jild. Dat is yn de rin fan jierren feroare. Sneupwerk levert it folgjende byld op:
Prizen op'e PC
- Jildprizen (goed 30 kear
- Gouden tientsjes (goed 85 kear)
- Gouden of sulveren foarwerpen (leppels, tabaksdoazen, horloazjes)
- Weardebonnen (goed 5 kear)
Yn de begjinjierren fan de PC wiene de ferskillen tusken priis en preemje grut. Tsjintwurdich folget de Keninklike PC op dit mêd it reglemint fan de KNKB.
Ek it tal prizen is sûnt 1854 ôf feroare. De tabel jout dêr it folgjende byld fan:
Tal prizen op de PC
- Oan 1885 ta wiene der 2 prizen. It gie doe benammen om de bêste keatser fan it priiswinnende partoer.
- Oan 1899 ta: 3 prizen
- Oan 1917 ta: 5 prizen
- Oan 1929 ta: 6 prizen
- Oan 1973 ta: 8 prizen
- Fan 1974 ôf binne der 4 prizen
Yn 1883 stelt de doetiidske Kommissaris fan de Kening, Baron van Harinxsma thoe Slooten de Sulveren Bal beskikber, dêr’t noch alle jierren fûleindich om keatst wurdt. Mei dizze priis krigen benammen eare en rom fan in PC-oerwinning ekstra klam.
Om rjocht te dwaan oan syn útgongspunten grypt de Keninklike PC werom nei de oarsprong fan it út te loven prizepakket.
Jildprizen:
Fan 2010 ôf giet it op de PC op ‘e nij om jildprizen: 4500 Euro foar de earste priis, 3000 Euro foar de twadde priis en 1500 Euro foar de tredde priis. De bedragen jilde per partoer. Foar de PC-winners is der as eareteken ek noch in gouden tientsje. Datselde jildt foar medaljes dy’t beskikber steld binne troch it Provinsjaal Bestjoer. De twaddepriiswinners krije in eareteken oanbean troch de kommisje.
It giet dus om jild en eare. Hokker fan dy beide it wichtigst is, falt min te sizzen. It is in twa-ienheid, net fan elkoar te skieden. Hoewol eare is duorsumer as jild.
De Keninklike P.C.
| 
Koninklijke PC - Postbus 208 - 8800 AE Franeker Netherlands