|
Oant likernôch 1850 wie der yntinsyf en troch in macht oan keatsers spile op de 'balferkeatsersdei', dy't alle jierren hâlden waard op it keatsfjild justjes bûten de Easterpoarte fan Frjentsjer. Dêrnei waard it hurd minder mei dizze âlde en ienris sa feestlike dei, dy't hieltiten mear yn 'e hannen kommen wie fan de kastleins en boppedat aloan mar rûger waard. Doe't der yn 1853 in djiptepunt berikt wie, besleat in 'directie', besteande út fiif Frjentsjerter notabelen, om de organisaasje fan de dei op him te nimmen en dy te 'ferheffen' ta in barren dat mear op ideële wearden stuolke wie. Fan it begjin ôf oan wie der súkses en groeide de dei op 'en nij út ta dy feestlike heechtiidsdei.
Sûnt har oprjochting bestiet de PC noch altiten út fiif leden en is se folslein eigen baas yn har wurken. Ut dy fêste basis wei giet se, trou oan de weardefolle tradysjes en oan har oprjochters, troch mei it sintraal stellen fan de alâlde sport, net beynfloede troch hokker kommersjele of oare belangen ek. De Kommisje, dy't sûnt har oprjochting noch mar acht foarsitters en mei-inoar 43 bestjoersleden hân hat, sjocht it as har bysûndere ferantwurdlikens om dizze âlde heechtiidsdei, wêr 't âlde tradysjes, kultuer en sport as ien gehiel belibbe wurde, geef troch te jaan oan de nije generaasjes.
| 
Koninklijke PC - Postbus 208 - 8800 AE Franeker Netherlands
