Spulregels keatsen

Algemien
It keatsen wurdt spile op in fjild fan 32 m x 61 m. De twa partoeren (teams) dy tsjininoar stride besteane elk út 3 spilers. De te heljen punten wurde oanjûn op de saneamde tillegraaf (scorebord) en binne te fergelykjen mei tennis, dat yn de 18e ieu ûntstien is út in fariant fan it keatsen. Dizze familjebannen binne werom te finen by de telling:
tennis: 0, 15, 30, 40, Game; 6 games: set
keatsen 0, 2, 4, 6, Earst; 6 earsten: út

De wedstriid wurdt sadwaande wûn troch it partoer dat it earst 6 earsten hellet.

Foarbielden fan standen:
a. Keatsen 3 – 2 4 – 6 ; Tennis 3 – 2 30 – 40
b. Keatsen 4 – 1 0 – 2 ; Tennis 4 – 1 0 – 15

It spul
Directe winst kin (a) troch in sitbal (ace) fan de opslagger (serveerder) en (b) as de perkspilers de bal boppeslaan. Yn it earste gefal kriget it opslaggerspartoer 2 punten, yn it twadde it perkpartoer 2 punten. Ballen dy bûten it perk falle (bûten) of bûten de sydlinen (kwea), leverje punten op foar resp. it perk en foar de opslaggers. De tekeninkjes a. en b. jouwe dat goed oan.

As de perkspilers de bal weromslaan kinne, mar net oer de boppeline, falle der noch gjin punten (c). It is noch ûnbeslist. Op it plak der’t de bal lizzen bliuwt wurdt in wyt blokje delsetten (1e keats). Bart dat nochris dan is dat plak foar in read blokje (2e keats).

Hoe helje de partoeren no fierder punten? U.o. troch de keatsen foarby te slaan. De partoeren wikselje by 2 keatsen of by 1 keats as ien fan de partoeren 6 punten hat. Slacht it perkpartoer de keats foarby dan levert dat 2 punten op. Slagget dat net dan kriget it oare partoer 2 punten. Nei beide slaggen binne der gjin ûnbesliste slaggen mear.

Taktiek

Der moat men net te licht oer tinke. It tekeninkje jout oan hoe’t de 2 spilers fan it opslachpartoer dy’t net opslaan har opstelle om in troch partoer 2 útsleine bal te kearen (sa meitsje se keatsen sa lyts mûglik) of werom te slaan achter de foarline (dan krije se punten).

Lizze der al keatsen dan stelle se har op op ien lijn mei dy keatsen. De boppeline wurdt bewekke troch in spiler, dy’t gauris belies jaan moat by de boppeslaggen út it perk wei.